Улсын бүртгэлийн ерөнхий газарт БНСУ-ын Солонгосын олон улсын хамтын ажиллагааны байгууллага буюу КОЙКА-ийн буцалтгүй тусламжаар хэрэгжүүлж буй “Улсын бүртгэлийн системийн үйл ажиллагааг дэмжих төсөл”-ийн хүрээнд “Дата төв”-ийн нээлтийн арга хэмжээ өнөөдөр /2022.05.10/ зохион байгуулагдлаа.
Энэхүү арга хэмжээнд УБЕГ-ын дарга Д.Дэлгэрсайхан, ХЗДХЯ-ны Олон улсын гэрээ, гадаад хамтын ажиллагааны газрын дарга Т.Бат-Өлзий, БНСУ-ын ЭСЯ-ны 1-р нарийн бичгийн дарга Пак Ин Жон, КОЙКА-ийн Суурин төлөөлөгч Ким Жун Мү, КОЙКА-ийн Орлогч дарга Ли Жа Ёон, “UplusIT” төслийн менежер Пак Ги Юун, төслийн багийн ахлагч Со Хөн Соп, “ТИ ЭС ЛАЙН System”-ын гүйцэтгэх захирал Ан Ин Ёп болон бусад албаны хүмүүс, мөн УБЕГ-ын газар, хэлтсийн дарга, албан хаагчдын төлөөлөл оролцлоо.
Арга хэмжээний эхэнд УБЕГ-ын дарга Д.Дэлгэрсайхан болон КОЙКА-ийн суурин төлөөлөгч Ким Жун Мү нар нээж үг хэлсэн бөгөөд үргэлжлүүлэн Дата төвийн танилцуулга, төслийн явцын талаарх тайлан мэдээг холбогдох албаны хүмүүс хүрэлцэн ирсэн зочдод танилцуулав.
УБЕГ-ын дарга Д.Дэлгэрсайхан арга хэмжээний үеэр Солонгосын олон улсын хамтын ажиллагааны байгууллага буюу КОЙКА-тай Улсын бүртгэлийн байгууллага 2011 оноос эхлэн хэд хэдэн төслүүд дээр хамтран амжилттай ажиллаж байгаагаа дурдаад, Улсын бүртгэлийн байгууллагын үйл ажиллагааг дэмжин, хамтран ажилладагт талархаж буйгаа илэрхийлэв. Түүнчлэн “Бид бүхэн чамгүй хүнд нөхцөлд энэхүү төслийг хэрэгжүүлж, төслийн санхүүжүүлэгч болон гүйцэтгэгч хоёр талын хариуцлагатай хамтын ажиллагаа, нягт уялдаа холбооны үр дүнд уг төсөл амжилттай хэрэгжлээ. Өнөөдөр бид КОЙКА-ийн туслалцаа дэмжлэгтэйгээр Улсын бүртгэлийн байгууллагад хэрэгжсэн төслийн хүрээнд албан ёсоор системээ хүлээн авч байна. Улсын бүртгэлийн байгууллага 330 сум, 172 хороо, 9 дүүрэг, 21 аймагт үйл ажиллагаа явуулдаг. Энэ бүх нэгжүүдэд тоног төхөөрөмж нийлүүлэгдсэн нь улсын бүртгэлийн байгууллагын үйл ажиллагааг хэвийн явуулахад, иргэдэд хүргэхэд, түүнчлэн цахимжилтад нилээн том дэмжлэг болж байгаа юм. Мөн зөвхөн тоног төхөөрөмж нийлүүлэхээс гадна мэргэжлийн албан хаагчдыг чадавхжуулах сургалт зохион байгуулагдсан. Өөрөөр хэлбэл тэрхүү сургалтууддаа инженер техник, системийн нарийн мэргэжлийн хүмүүсээ сургаж авсан нь их том талархууштай үйл явдал боллоо. Улсын бүртгэлийн байгууллага төрийн томоохон хэмжээний цахимжилт, томоохон хэмжээний суурь үйлчилгээг үзүүлдэг байгууллага. Энэ суурь үйлчилгээндээ бид тодорхой хугацаанд тоног төхөөрөмжийн ачаар үр дүнгээ өгөх нь дамжиггүй. Солонгос, Монгол талын гүйцэтгэгч компаниуд мэргэшсэн, чадварлаг хүмүүс байсан нь Улсын бүртгэлийн байгууллагын түүхэнд том байр суурь эзлэх бүтээн байгуулалт болж чадлаа хэмээн харж байна” гэлээ.
КОЙКА-ийн орлогч дарга Ли Жа Ёон “Албаны хүмүүсийн хэлсэнчлэн энэхүү төсөл 21 аймаг болон бусад дүүрэг, нэгжүүдэд хэрэгжсэн учир Монгол Улсын Засгийн газрын хэрэгжүүлж буй “Е-Mongolia” төсөлд мөн хувь нэмрээ оруулж байна. 2020-2022 оны хооронд улсын бүртгэлийн ерөнхий газартай хамтран бүртгэлийн системийг сайжруулах төслийг хэрэгжүүлж байгаа бөгөөд төслийн хүрээнд улсын бүртгэлийн байгууллагын иргэний, эд хөрөнгийн, хуулийн этгээдийн бүртгэлийг хийхэд зайлшгүй шаардлагатай тоног төхөөрөмжийг нэмэгдүүлэх, боловсон хүчнийг чадавхжуулах, системийг сайжруулах зэрэг ажлуудыг хамтран хэрэгжүүллээ. Бидний төсөл амжилттай хэрэгжиж тодорхой үр дүнд хүрлээ” гэв.
БНСУ-ын КОЙКА-ийн буцалтгүй тусламжаар хэрэгжиж буй “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх төсөл” нь 2022 оны 09 дүгээр сар хүртэл улсын бүртгэлийн байгууллагад хэрэгжих юм.
УБЕГ-ын Хамтын ажиллагаа, сургалтын хэлтэс
